சந்திரமதி (1)

ஆஸ்திரேலிய வானொலியில் நான் தொகுத்து வழங்கும் காற்றினிலே வரும் கீதம் நிகழ்ச்சியில் அரிச்சந்திரபுராணம் விவாக காண்டத்திலிருந்து சந்திரமதி குறித்தான சில வர்ணனைப் பாடல்களை எடுத்துத் தொகுத்து பொருத்தமானத் திரைப்பாடல்களோடு ஒரு தொகுப்பை வழங்கினேன். நான் தொகுத்தளித்த அப்பாடல்களை இங்கு உங்களுடனும் பகிரவிரும்பிப் பதிகிறேன்.

உண்மையை மட்டுமே பேசும் ஒருவனுக்கு ஏற்படும் பெருந்துயரையும் எவ்வளவு சோதனைகள் வேதனைகள் உண்டானாலும் இறுதியில் வாய்மையே வெல்லும் என்பதற்கேற்ப அவனுடைய சோதனைக்காலம் முடிந்து ஆனந்தப்பெருவாழ்வு பெற்றதையும் கதையாகச் சொல்வதுதான் அரிச்சந்திரபுராணம்.. அரிச்சந்திர மகாராஜாவைக் காணும் பொருட்டு தீர்த்தயாத்திரையில் உள்ள முனிவர் பெருமக்கள் அவன் நாட்டுக்கு வருகின்றனர். அரிச்சந்திரன் அவர்களை வரவேற்று உபசரித்து அளவளாவிக் கொண்டிருக்கிறான். முனிவர் பெருமக்கள் எந்தெந்த தேசம் போனார்கள்… என்னென்ன புண்ணியதரிசனம் பெற்றார்கள் என்ன புதுமைகள் கண்டார்கள் என்றெல்லாம் விசாரிக்க, அதற்கெனவே காத்திருந்தது போல முனிவர்கள் சொல்லத் தொடங்குகிறார்கள்.

அங்கண் மாநிலத்து அரிய கன்னோசி நாட்டகத்துப்

பொங்கு கண்டகி என்பதோர் புண்ணிய தீர்த்தம்

அங்கு யாம் புகுந் தாடி நின் அருள் முகங் காண

இங்கு வந்தனம் இன்னமும் கேட்டி என் றிசைப்பார்.

அந்த நாட்டினில் கன்னமா புரி நகராள்வோன்

சந்தி ரன் வழிச் சந்திர தயன் தவம் புரிந்து

கந்த வார்சடைக் கடவுள்தன் வரத்தினால் பயந்த

தந்த மாமுலைத் தையல் சந்திரவதி என்பாள்.

நாங்கள் அங்கண் மாநிலத்து கன்னோசி நாட்டு பொங்கு கண்டகி என்னும் புண்ணிய தீர்த்தத்தில் நீராடியபிறகு நேராக உன்னைக்காண இங்கு வந்திருக்கிறோம். அந்த நாட்டை ஆளும் சந்திரதயன் என்னும் சந்திரகுல அரசனுக்கு சிவபெருமானின் வரத்தால் பிறந்த, யானைத்தந்தங்களைப் போன்ற மதர்த்த கொங்கைகளைக் கொண்ட சந்திரமதி என்னும் மகள் இருக்கிறாள் என்கின்றனர். அவளை அரிச்சந்திரன் மணமுடிக்கும் பொருட்டு அவளைப்பற்றியும் அவளுக்கு நடக்கவிருக்கும் சுயம்வரம் பற்றியும் முனிவர் பெருமக்கள் அரிச்சந்திரனிடம் எடுத்துரைக்கிறார்கள். ஆஹா.. ஆரம்ப அறிமுகமே இப்படியென்றால் போகப் போக வர்ணனைகள் எப்படியிருக்குமோ என்ற ஆவல் எழுகிறதல்லவா…


மண்ம டந்தையர் தம்முளும் வாசவன் உறையும்

விண்ம டந்தையர் தம்முளும் நிகரிலா விறல் வேல்

கண்மடந்தை தன் கருங்குழல் அருத்ததிக் கற்பிற்கு

எண்மடங்கு கற் புடையள் இந்திரையினும் எழிலாள்.

சந்திரமதி எப்படிப்பட்டவளாம்? மண்ணுலகப் பெண்கள் மட்டுமல்ல, இறைவன் உறைந்திருக்கும் விண்ணுலகத்துப் பெண்களுள்ளும் யாருக்கும் நிகரில்லாத அளவுக்கு அழகிய வேல் போன்ற கண்களை உடையவள், குளிர்ந்த கருங்கூந்தலை உடையவளும் கற்புக்கு இலக்கணமானவளுமாகிய அந்த அருந்ததியைக் காட்டிலும் எட்டு மடங்கு கற்புடையவள்.. திருமகளை விடவும் அழகு வாய்ந்தவள் என்கிறார்கள் முனிவர்பெருமக்கள். முனிவர்களே வர்ணிக்கும் அளவுக்கு அழகு என்றால் சந்திரமதியின் அழகு எப்படிப்பட்டதென்று நம்மால் யூகிக்க முடிகிறதல்லவா?

முகிலை வென்று அறலைக் கடிந்து சைவலத்தை

முனிந்து பொற் கடுக்கையை முடுக்கி

அகில் நறும்புகையும் தகரமும் புழுகும்

அளைஇப் பனி நீரிலே நனைந்து

பகலவற்கு உடைந்து வகையினால் வெள்கிப்

பலமலர்த் தார் அணிந் தவனோடு

இகல்செயக் கருதி இருள் திரண் டு ஆலித்

தெழுந்தன செழுந்தடங் குழலாள்.

அடேயப்பா… கூந்தல் வர்ணனை ஒன்றே முற்றுப்புள்ளியில்லாமல் தொடர்ந்துகொண்டு போகிறதே… சந்திரமதியின் கூந்தல் அழகு எப்படிப்பட்டது தெரியுமா? நிறத்தால் கருமேகத்தை வென்றதாம்.. சீராக அமைந்திருப்பதில் கருமணலையும் பாசியையும் துரத்தியதாம்.. பளபளக்கும் அழகினில்… சடைசடையாய்த் தொங்கும் கருவண்ணக் கொன்றைக்காயை விஞ்சியதாம். இதெல்லாம் எப்படி வாய்த்ததாம்? நறுமண அகிலின் புகையும், மயிர்ச்சாந்தும், புனுகும் கலந்து பூசப்பட்டு பனிநீரில் நனையப்பெற்றதால் உண்டான வசீகரமாம் அது. அவள் கூந்தல் அழகைப் பார்ப்பதற்கு எப்படியிருக்கிறது தெரியுமா?… சூரியனிடம் தோற்றோடிய இருளானது, வெட்கி, பற்பல பூமாலைகளைச் சூடிக்கொண்டு அந்த சூரியனோடு போர் புரிய எண்ணி ஒன்றுகூடித் திரண்டு ஆரவாரித்து எழுந்தது போன்று காட்சியளிக்குமாம் அவளுடைய அழகிய அடர்த்தியான நீளமான கூந்தல்… எந்தப் பெண்ணுக்கும் மெல்லிய பொறாமை நிச்சயமாய் எட்டிப்பார்க்குமன்றோ?

(குறிப்பு - அரிச்சந்திரனின் மனைவி பெயர் சந்திரவதி என்றாலும் நாம் சந்திரமதி என்றே குறிப்பிட்டுப் பழகியிருப்பதால் அப்பெயரையே இப்பதிவிலும் தொடர்ந்துவரும் பதிவுகளிலும் பயன்படுத்தியுள்ளேன்.. குழப்பம் வேண்டாம். சந்திரவதி என்பதே சரி.)

(தொடரும்)

(படங்கள் உதவி: இணையம்)