எல்லாமே கையளவுதான்

தோட்டத்துப் பிரதாபம் 30 

1. தோட்டத்தின் முதல் மல்லிகைப் பூக்கள்

கையளவு கையளவு மனசு - அதில்
கடலளவு கடலளவு கனவு 
நித்தம் போராட்டம் ஆடுகின்ற மனசோடு ஒப்பிட்டால்
அம்மம்மா பூமி ரொம்பச் சிறுசு!

- கவிஞர் வைரமுத்து.

கையளவு நெஞ்சத்திலே கடலளவு ஆச மச்சான்

அளவு ஏதும் இல்ல அதுதான் காதல் மச்சான்

- கவிஞர் யுகபாரதி

கற்றதுகைம் மண்ணளவு கல்லாத துலகளவென்(று)

உற்ற கலைமடந்தை ஓதுகிறாள் - மெத்த 
வெறும்பந்த யங்கூற வேண்டாம் புலவீர்

எறும்புந்தன் கையாலெண் சாண்

- ஔவை தனிப்பாடல்

மெட்ரிக் அளவைகள் புழக்கத்துக்கு வருவதற்கு முன்பு நாம் பயன்படுத்திய அளவைகள் வேறு. மிகக் குறைந்த அளவிலான நீட்டல் அளவைகளையும் தூரத்தையும் கொள்ளளவையும் நேரத்தையும் நம்முடைய உடலுறுப்புகளைக் கொண்டே அப்போது மதிப்பிட்டிருக்கிறோம். உடலுறுப்புகள் ஆளுக்காள் மாறினாலும் கொஞ்சம் முன் பின் இருந்தாலும் பொதுவான  அளவைகளாக அவை ஏற்கப்பட்டிருந்தன.

சிலருடைய சமையல் மிக அருமையாக இருக்கும். அளவு கேட்டால் எல்லாம் கண்ணளவு கையளவுதான் என்பார்கள்.  ஏட்டறிவை விடவும் அனுபவ அறிவே அவர்களை வழிநடத்துவதால் எடை பார்க்கும் கருவியோ, அளத்தல் கருவியோ தேவைப்படாமல் எளிதாய் அளவைக் கணிக்க அவர்களால் இயலும்.

உடலுறுப்பு சார்ந்த அளவைகளைக் கொண்டு அந்தக் காலத்தில் பல பழமொழிகள் உருவாயின. அவற்றுள் சில.

• கற்றது கையளவு கல்லாதது கடலளவு. 
• ஐந்து விரல்களும் ஒரே மாதிரி இருப்பதில்லை.
• உள்ளங்கை நெல்லிக்கனி போல.
• நகத்தால் கிள்ளியெறிய வேண்டியதை கோடரி கொண்டு வெட்டலாமா?
• மெய்க்கும் பொய்க்கும் விரற்கடை தூரம்.

(விரற்கடை என்பது ஒரு விரலின் அகலம். நான்கு விரல்களையும் சேர்த்து வைத்தால் வரும் அளவு நான்கு விரற்கடை. பாம்பு கயிறு போன்றவற்றின் பருமனைக் குறிக்க விரல்களை அளவீடாகச் சொல்லும் வழக்கம் உண்டு.)

• எல்லாமே ஒரு சாண் வயிற்றுக்குத்தான்.
• எண் சாண் உடம்புக்கு சிரசே பிரதானம்.

(ஐந்து விரல்களையும் அகல விரித்து கட்டைவிரலின் நுனியிலிருந்து சுண்டுவிரலின் நுனி வரையிலான அளவு சாண்.)

• சாண் ஏறினால் முழம் சறுக்கல்.
• வெறுங்கை முழம் போடுமா?
• தலைக்கு மேலே வெள்ளம் போன பிறகு சாண் என்ன? முழம் என்ன?

(நடுவிரல் நுனியிலிருந்து முழங்கை வரையிலான அளவு முழம். தொடுத்தப் பூக்களை பொதுவாக முழம் கணக்கில் விற்பார்கள். ஆனால் திருச்சியில் கண்ணிகளை எண்ணி நூறு இருநூறு என்ற கணக்கில் கொடுப்பார்கள். :) )

• இட்ட அடி சிவக்க எடுத்த அடி கொப்பளிக்க...

நடக்கும்போது ஒரு காலடிக்கும் மறு காலடிக்கும் இடைப்பட்ட தூரம் அடி. பத்தடி தூரத்தில் ஒரு பாம்பைப் பார்த்தேன் என்பார் தாத்தா.

யாரடி வந்தார் என்னடி சொன்னார்

ஏனடி இந்த உல்லாசம்?

காலடி மீதில் ஆறடிக் கூந்தல்

மோதுவதென்னடி சந்தோஷம்?

என இப்பாடலில் கூந்தலின் நீளத்தைக் குறிப்பிட அடிக்கணக்கைப் பயன்படுத்துகிறார் கவிஞர் கண்ணதாசன். 

மூன்று அடி கொண்டது ஒரு கஜம். முன்பெல்லாம் புடவைகளை எட்டு கஜம் ஒன்பது கஜம் என்று கஜக் கணக்கில்தான் சொல்வார்கள்.

இப்போதும் சில திரைப்பாடல்களில் அஞ்சு கஜம் காஞ்சிப் பட்டு, எட்டு கஜம் சேலை கட்டு என்று வரிகள் ஆங்காங்கே காதில் விழுகின்றன. :) 

ஓராள் உயரம், முழங்கால் அளவு, கணுக்கால் அளவு, இடுப்பளவு, மார்பளவு, கழுத்தளவு என ஒருவரின் சராசரி உயரத்தை உத்தேசமாக வைத்து அளவைகளைக் குறிப்பிடும் அனுமான முறையும் இருந்திருக்கிறது.

தொலைவைக் குறிப்பிடும்போது கூப்பிடுதூரம் என்பார்கள். ஒருவர் அழைத்தால் அந்த அழைப்பொலி கேட்கும் தூரம் என்பது அழைப்பவரின் குரலையும் அக்கம்பக்கத்து ஒலி இடையூறுகளையும் பொறுத்தது. ஆளுக்காள் மாறக்கூடியது என்றாலும் பொதுவான அளவீடாகவே கணிக்கப்பட்டது.

கூப்பிடு தூரம், கல்லெறி தூரம் போன்று கண் காணா தூரம் என்ற அளவீடும் அப்போது புழக்கத்தில் இருந்திருக்கிறது.

கொம்புளதற் கைந்து குதிரைக்குப் பத்துமுழம் 

வெம்புகரிக் காயிரம்தான் வேண்டுமே - வம்புசெறி 

தீங்கினர்தம் கண்ணின் தெரியாத தூரத்து 

நீங்குவதே நல்ல நெறி.

கொம்புள்ள ஆடு மாடுகளிடமிருந்து ஐந்து முழ தூரமும் குதிரையிடமிருந்து பத்து முழ தூரமும் யானையிடமிருந்து ஆயிரம் முழ தூரமும் தள்ளியிருக்க வேண்டும். ஆனால் மற்றவர்களுக்குக் கெடுதல் செய்வதையே தொழிலாகக் கொண்ட தீயவர்களிடமிருந்து அவர்களுடைய கண் காணா தூரத்திற்குச் சென்று இருப்பதே நன்மை பயக்கும் என்கிறது இந்த நீதிவெண்பா.  

கொள்ளளவு

குறைந்த அளவு கொள்ளளவிலும் உடற்பாகங்கள் இடம்பெறுவதுண்டு. சில இப்போதும் புழக்கத்தில் உள்ளன. 

• சிட்டிகை (கட்டைவிரல் நுனிக்கும் ஆட்காட்டி விரல் நுனிக்கும் இடைப்பட்ட பகுதியில் அள்ளப்படும் அளவு)
• கைப்பிடி (விரல்களை மூடும்போது கைப்பிடிக்குள் அடங்கும் அளவு. புடிச்ச புடி என்பது பேச்சுவழக்கு.)
• ஒரு கை அளவு (விரல்களை மடக்கி கையைக் கிண்ணம் போல ஆக்கும்போது அதற்குள் அடங்கும் அளவு)
• மிடறு (ஒரு முறை பருகும் திரவத்தின் அளவு)
• கவளம் (ஒரு முறை விழுங்கும் உணவின் அளவு)

நேரம்

கண் இமைக்கும் நேரம், சொடக்குப் போடும் நேரம் என்ற உடற்பாகங்கள் சார்ந்த நேர அளவைகளையும் கேட்டிருப்போம்.

*****

எதற்கு இப்போது இதையெல்லாம் குறிப்பிடுகிறேன் என்று நீங்கள் யோசிக்கலாம். தோட்டத்துக் காய்களையும் பூக்களையும் பழங்களையும் படம் பிடிக்கும்போது அவற்றின் அளவைக் கவனத்தில் கொள்ள நான் பெரும்பாலும் என்னுடைய இடக் கையைத்தான் ஒப்பீடாகப் பயன்படுத்துகிறேன். ஏன் இடக்கை? வலக்கையில்தான் கேமராவோ மொபைலோ இருக்கிறதே! எவ்வளவு பெரிசு என்ற பிரமிப்பைக் காட்டவும் எவ்வளவு சின்னது என்ற வியப்பைக் காட்டவும் உடனடி ஒப்பீட்டளவாக கையையும் விரல்களையும் விட்டால் வேறென்ன சரியாக இருக்கும்?

பழைய ஃபோல்டர்களைப் பார்த்தபோது இந்தப் படங்கள் யாவும் வெகு சுவாரசியமாக இருந்தன. ஏன் இவற்றைத் தொகுத்து ஒரு பதிவாகப் போடக்கூடாது என்று தோன்றியது. அதனால் தோட்டத்துப் பிரதாபம் வரிசையில் இன்று இவை. 😊 

2. கட்டைவிரல் நகத்தை விடவும் சிறிய சவ்சவ் பெண் பூ

3. கட்டைவிரல் நகம் அளவே உள்ள பூச்சி

4. பாம்புச் சட்டைக்கும் அளவெடுத்தாச்சி - இரண்டு விரற்கடை அகலம்தான்

5. விரல் நீளமுள்ள பெரிய அந்துப்பூச்சி

6. புல்லின் பூக்கள் - எள்ளை விடவும் சிறியவை

7. சுண்டைக்காய் அளவிலான குட்டித் தக்காளிகள் 

8. நீல அனிச்சம் பூ - கட்டைவிரல் நகத்தில் கால்வாசிதான் இருக்கும்

9. அசுவுனிப் பூச்சியின் உடலில் முட்டையிடும் அசுவுனிக்குளவி

10. முழுநெல்லிக்காய் அளவிலான குட்டித் தக்காளிகள்

11. முழ நீளமுள்ள பாகற்காய்

12. தோட்டத்தில் கிடைத்த, பறவை முட்டை ஓடு

13. உள்ளங்கையை விடவும் அகலமான கற்பூரவல்லி இலைகள்

14. சுட்டுவிரல் மேல் வந்தமர்ந்த குட்டிப் பொறிவண்டு

15. மூக்குத்தி அளவிலான புளியாரைப் பூ

16. நகக்கண் அளவே உள்ள பொறிவண்டு

17. கிடாரங்காய் அளவில் எலுமிச்சம்பழம்

18. கையளவுக் கிண்ணத்தில் குட்டித் தக்காளிகள்

19. சல்லடையாகிப் போன கொய்யா இலைச் சருகு

20. இதய வடிவில் பெரிய குண்டு கத்தரிக்காய்

21. லேடீஸ் ஃபிங்கர்ஸை விடவும் பெரிய வெண்டைக்காய்கள்

22. மூக்குத்தி அளவிலான குட்டி குட்டி லாவண்டர் பூக்கள்

23. நகத்தளவே நீளமுள்ள ஆஸ்திரேலியாவின் அழகுக் கரப்பான்பூச்சி

24. மிகச் சன்னமான பாசித் தாவரங்கள்

25. கைக்கொள்ளாத அளவில் கனத்தக் கத்தரிக்காய்

26. யானைக் காதை விடவும் பெரிய சேம்பிலை

27. ஆரஞ்சு வண்ண அனிச்சம் பூ

கீழே இருப்பவை கொசுறு

ஒரு பூங்காவில் எடுக்கப்பட்டவை. 

28. பூத்துக் குலுங்கும் விஸ்டரீயா கொடி

29. உதிர்ந்து கிடந்த ஒரு விஸ்டரியா பூவைக் கையிலேந்தியபோது

30. வண்ணத்துப்பூச்சியொன்று கையில் அமர்ந்து இளைப்பாறியபோது

*****

(தோட்டத்துப் பிரதாபங்கள் தொடரும்)

அசத்தும் அழகு ஆர்க்கிட் மலர்கள் -2 (பூக்கள் அறிவோம் 115-120)

1. மோத் ஆர்க்கிட் பூக்கள்

ஆர்க்கிட் குடும்பத்தில் நூற்றுக்கணக்கான பேரினங்களும் ஆயிரக்கணக்கான சிற்றினங்களும் உள்ளன என்று ஏற்கனவே பார்த்தோம். அவை ஒவ்வொன்றுக்குமான பராமரிப்பு அம்சங்கள் அவை வாழும் நிலப்பரப்பு, ஒட்டி வாழும் மரம் அல்லது பாறை, தட்பவெப்ப நிலை போன்றவற்றைப் பொறுத்து மாறுபடுகின்றன. மரத்தில் ஒட்டி வாழும் என்றவுடன் ஒட்டுண்ணியாக வாழ்கிறது என எண்ணிவிடலாகாது. இவை மேலொட்டிகள். அதாவது மரத்தைப் பற்றிக்கொண்டு வளருமே தவிர, மரத்திலிருந்து சத்துக்களை உறிஞ்சுவது கிடையாது. காற்று, மழை இவற்றிலிருந்து தங்களுக்குத் தேவையான சத்துக்களைப் பெற்றுக்கொண்டு வளரக்கூடியவை. ஒரு பிடிப்புக்காக மட்டுமே ஆர்க்கிட் தாவரங்களின் வேர்கள் மரங்களைப் பற்றிக்கொண்டு வளர்கின்றன. சில வகை ஆர்க்கிட் செடிகள் பாறைகளைப் பற்றிக்கொண்டு வளர்கின்றன. மரப்பட்டைகளுக்குள்ளும் பாறை இடுக்கிலும் தேங்கியிருக்கும் மழை நீரையும் மரப்பட்டைகளின் மீது வளரும் பூஞ்சைகளிலிருந்தும் சத்துக்களைப் பெறுவதும் உண்டு. 

ஆர்க்கிட் செடிகள் அதிகப்படியான  நீரையும் சத்துக்களையும் pseudobulb என்ற சேகர உறுப்பில் சேமித்துவைத்துக் கொள்கின்றன. பிறகு தேவைப்படும் காலத்தில் தங்கள் சேகரிப்பிலிருந்து செலவழித்துக்கொள்கின்றன. தாங்கள் சார்ந்து வாழும் மரத்துக்கு எந்த விதத்திலும் தொந்தரவு கொடுக்காமல் தங்களுக்கு வேண்டிய சத்துக்களை தாங்களே சேகரித்துச் செலவழிக்கும் அளவுக்கு எவ்வளவு தற்சார்புடையவையாக உள்ளன இந்த ஆர்க்கிட் தாவரங்கள்? 

115. கைட் ஆர்க்கிட்

2. கைட் ஆர்க்கிட் (1)

ஆர்க்கிட் பூக்களின் வழக்கமான வடிவத்தை விடவும் வித்தியாசமான வடிவத்தைக் கொண்டவை இந்த கைட் ஆர்க்கிட் பூக்கள். வாலோடு பறக்கும் காற்றாடியைப் போன்று காட்சியளிப்பதால் ‘பட்டம் ஆர்க்கிட்’ என்ற பொருளில் கைட் ஆர்க்கிட் எனப்பெயர் சூட்டப்பட்டுள்ளன. மூன்று புறவிதழ்களுள் ஒன்று மேல் பகுதியிலும் மற்ற இரண்டும் கீழ்ப்பகுதியிலுமாகக் காணப்படும். ஒவ்வொரு புறவிதழின் நுனியிலும் வால் போன்ற நீட்சி காணப்படும். இவை தென்னமெரிக்காவின் ஆண்டியன் மலைத்தொடரைத் தாயகமாகக் கொண்டவை.

2. கைட் ஆர்க்கிட் செடி

 

3. கைட் ஆர்க்கிட் close-up

கைட் ஆர்க்கிட் பராமரிப்பு என்பது மிகவும் கூடுதலான சிரத்தையும் அர்ப்பணிப்பும் தேவைப்படும் ஒன்றாகும். இவற்றுக்கு 60% முதல் 80% வரையிலான ஈரப்பதமும் குளிர்ச்சூழலும் எப்போதும் தேவை. அதே சமயம் எப்போதுமே ஈரப்பதத்துடன் இருப்பதால் பூஞ்சை மற்றும் பாக்டீரியா போன்ற நுண்ணுயிர்களின் தாக்கம் வெகு எளிதில் ஏற்பட்டுவிட வாய்ப்புள்ளது. அவற்றிலிருந்து பாதுகாக்க நல்ல காற்றோட்டமும் அவசியம். ஒரு நாளைக்கு இரண்டு மணி நேர சூரிய ஒளி தேவை. ஆனால் நேரடி சூரிய ஒளியாக இருத்தல் கூடாது. அதிக வெப்பம், அதிக வெளிச்சம், நேரடி சூரிய ஒளி, குறைந்த ஈரப்பதம் போன்றவை இவற்றின் வளர்ச்சியைப் பாதிக்கும் அம்சங்களாகும். தண்ணீரும் கூட தாது உப்புகள் அற்ற நன்னீராக இருத்தல் அவசியம். 

4. கைட் ஆர்க்கிட் பூ

Masdevallias பேரினத்தைச் சேர்ந்த இவற்றுள் சுமார் 350 சிற்றினங்கள் உள்ளன. இவை வெள்ளை, மஞ்சள், ஊதா, சிவப்பு, ஆரஞ்சு, அரக்கு, பழுப்பு, இளஞ்சிவப்பு, பச்சை, நீலம் என அனைத்து வண்ணங்களிலும், கோடுகள் அல்லது புள்ளிகள் அல்லது திட்டுகள் போன்றவற்றுடனோ அல்லது எதுவும் இல்லாமலோ காணப்படுகின்றன. 

116. மோத் ஆர்க்கிட்

5. மோத் ஆர்க்கிட் (1)

6. மோத் ஆர்க்கிட் (2)

இந்தியா, சைனா, தைவான், ஆஸ்திரேலியா மற்றும் இந்தோனேஷியத் தீவுகளைத் தாயகமாகக் கொண்டவை மோத் ஆர்க்கிட் செடிகள். எதனால் இந்தப் பெயர்? உற்றுப் பார்த்தால் உள்ளே ஒரு அந்துப்பூச்சி பறப்பதைப் போன்று இருப்பதால் இப்படியொரு காரணப்பெயர். இதன் பேரினப் பெயரான Phalaenopsis  என்பதற்கு லத்தீன் மொழியில் ‘அந்துப்பூச்சியைப் போன்றது’ என்று பொருள்.

7. மோத் ஆர்க்கிட் (3)

8. மோத் ஆர்க்கிட் (4)

9. மோத் ஆர்க்கிட் (5)

கொத்து கொத்தாகப் பூக்கும்  பூக்கள் இரண்டு முதல் மூன்று மாதம் வரை செடியில் வாடாமல் இருக்கும். மோத் ஆர்க்கிட் செடிகள் மேலொட்டியாக வளர்வதற்கு  மரங்கள் அவசியம்.   

10. மோத் ஆர்க்கிட் (6)

ஆனால் கடைகளில் மோத் ஆர்க்கிட் செடிகள்  எப்படி விற்பனை செய்யப்படுகின்றன?  அவை மரத்துக்குப் பதிலாக மரச்செதில்கள் அல்லது சதுப்புப்பாசியுள்ள தொட்டியில் எந்தப் பிடிமானமும் இன்றி வளர்க்கப்பட்டிருக்கும்.

117. கேண்டில்ஸ்டிக் ஆர்க்கிட்

11. கேண்டில்ஸ்டிக் ஆர்க்கிட்

Arpophyllum  பேரினத்தைச் சேர்ந்த இந்த வகை ஆர்க்கிட் பூக்கள் நீளமான குச்சியில் பூக்களைச் சொருகி வைத்தாற்போல சுமார் 40 செ.மீ. உயரத்துக்கு வரிசையாகப் பூத்திருக்கும். மெழுகுவர்த்தி ஸ்டாண்ட் போல தோற்றமளிப்பதால் கேண்டில்ஸ்டிக் ஆர்க்கிட் என்ற பெயரும் ஹயாசிந்த் மலர்க்கொத்து போல இருப்பதால் ஹயாசிந்த் ஆர்க்கிட் என்ற பெயரும் உண்டு. 

12. கேண்டில்ஸ்டிக் ஆர்க்கிட் செடி

Arpophyllum என்னும் பேரினப் பெயருக்கு கிரேக்க மொழியில் 'கத்தி போன்ற இலைகளைக் கொண்டது' என்று பொருள். இப்பேரினத்தில் ஐந்து சிற்றினங்கள் உள்ளன. தென்னமெரிக்காவையும் மேற்கத்தியத் தீவுகளையும் தாயகமாகக் கொண்டவை.   

118. நோபிள் ராக் ஆர்க்கிட் 

13. நோபிள் ராக் ஆர்க்கிட்

Dendrobium பேரினத்தைச் சேர்ந்த இந்த ஆர்க்கிட் நோபிள் ராக் ஆர்க்கிட் அல்லது நோபிள் டென்ட்ரோபியம் எனப்படுகிறது. இமயமலைப் பகுதியைத் தாயகமாகக் கொண்ட இந்த ஆர்க்கிட் மலர் சிக்கிம் மாநிலத்தின் மாநில மலர் என்ற சிறப்புக்குரியது. 

சீனப் பாரம்பரிய மருத்துவத்தின் அடிப்படையான ஐம்பது மூலிகைகளுள் இந்த நோபிள் டென்ட்ரோபியம் ஆர்க்கிட் மலர்களும் ஒன்று.

119. பைன் கூம்பு போன்ற ஆர்க்கிட் 

14. பைன் கூம்பு போன்ற ஆர்க்கிட்

15. பைன் கூம்பு போன்ற ஆர்க்கிட் செடி

பைன் கூம்பைப் போல இந்த ஆர்க்கிட் பூங்கொத்து இருப்பதால் இதற்கு Pine-cone like raceme dendrobium என்ற நீளமான பெயர். இதன் பெயரை வைத்தே இதுவும் Dendrobium பேரினத்தைச் சேர்ந்தது என்பதை அறிந்துகொள்ளலாம். 

16. வெள்ளை மஞ்சள் பூக்கள்

வெள்ளை நிறத்தில் வெளி இதழ்களும் மத்தியில் மஞ்சள் வண்ணமும் கொண்ட இந்த வகை ஆர்க்கிட் பூக்கள் நறுமணம் மிகுந்தவை. இமயமலைப் பிரதேசத்தை ஒட்டிய இந்திய, சீன, பூட்டான் பகுதிகளிலும் இந்தோசீன மலைத்தொடரை ஒட்டிய பகுதிகளிலும் இயல்பாக வளரக்கூடியவை. 

120. டான்சிங் லேடி ஆர்க்கிட்

17. ஆரஞ்சு நிற டான்சிங் லேடி ஆர்க்கிட் 

18. மஞ்சள் நிற டான்சிங் லேடி ஆர்க்கிட்

பார்ப்பதற்கு கவுன் அணிந்த பெண்கள் நடனமாடுவதைப் போன்று காட்சியளிப்பதால் இதற்கு ‘டான்சிங் லேடி ஆர்க்கிட்’ என்ற செல்லப்பெயர் இடப்பட்டுள்ளது. Oncidium பேரினத்தில் முந்நூற்றுக்கும் மேற்பட்ட சிற்றினங்கள் உள்ளன.  பெரும்பாலும் மரங்களைச் சார்ந்து வாழ்பவை. சில வகை ஆன்சிடியம் பூந்தண்டுகள் மூன்று முதல் மூன்றரை மீட்டர் நீளம் இருக்கும். சில வகை 15 செ.மீ. அளவு மட்டுமே இருக்கும்.

19. டான்சிங் லேடி ஆர்க்கிட் பூக்கள்

பூக்கள் மஞ்சள் முதல் பழுப்பு வரையிலான நிற பேதங்களுடன் காணப்படும். பூங்கொத்து போல ஒரே கிளையில் எக்கச்சக்கமாகப் பூப்பதால் ‘ஸ்ப்ரே ஆர்க்கிட்’ என்ற இன்னொரு செல்லப்பெயரும் இவற்றுக்கு உண்டு. 

****

வேறு சில வித்தியாசமான ஆர்க்கிட் பூக்களைப் பற்றி அடுத்தப் பதிவில் பார்க்கலாம். 

20. லேலியா ஆர்க்கிட்

(தொடரும்)