விடைபெறவியலா வினாக்கள்

உன் விபரீதச் செயல்களுக்கான

மூலகாரணம் பற்றிய வினாக்களுக்கு

நீ ஒருபோதும் முக்கியத்துவம் தருவதேயில்லை!

பின்விளைவுகளெனத் தொடரும்

முறிந்துபோன மனங்களின் எண்ணிக்கை பற்றியோ

முடங்கிப்போன செயல்பாடுகளின் நல்லாதாயங்கள் பற்றியோ

மீண்டுமொரு விவாதத்தை முன்வைப்பதை

முற்றிலும் நீ ஏற்பதுமில்லை!

உன்னிடம் எழுப்பப்பட்ட வினாக்கட்டடங்களை

நீ எட்டி உதைத்துத் தரைமட்டமாக்கியிருக்கிறாய்,

எச்சில் உமிழ்ந்து ஏளனம் செய்திருக்கிறாய்,

ஏவியவர் மேலேயே எடுத்தெறிந்து வீசியிருக்கிறாய்!

ஆனால் அவற்றுக்கான விடைகளை

என்றுமே எடுத்துரைத்ததில்லை!

நீ விடைகள் அளிக்கவிரும்பாத

வினாக்கள் பற்றிய கவலை எனக்கெப்போதும் உண்டு.

உன்னிடம் விடைபெற முயன்று பிரியாவிடைபெற்றவர்களின்

விசேசப்பிரதிநிதியாக உன்முன் நிற்கிறேன்,

எதுவும் வீண்போகவில்லை,

உன் விநோதகுணம் பற்றி விவரமாகவே அறிந்துகொண்டேன்!

பதில் தரவியலாக் கேள்விகள் எதுவும்

உன் முன்வைக்கப்படவில்லை என்பதை

மற்றவர்களைப்போலவே நீயும் அறிந்திருக்கிறாய்!

பதில் சொல்வதன் மூலம்

உன் ஆழ்மனக்கிடக்கைகளை, உன் அந்தரங்கக் கிடங்கை,

உன் அனர்த்தம் நிறைந்த புரிதல்களை,

மூச்சுவிடத்திணறும் உன் குறுகிய மனவோட்டங்களை...

அடுத்தவர் அறிந்துகொள்வதைத் தவிர்க்கிறாய்!

இதுபோன்ற அளவீடுகளால் உன் சுற்றுப் பரிமாணங்கள்

அனுமானிக்கப்பட்டு அறுதியிட்டுரைக்கப்படுவதை

அடியோடு வெறுக்கிறாய்!

இருளுக்குள் ஒளியும் நிழல்போல

பாதுகாப்பாய் உன்னை... உன் இருப்பை...

நிலைநிறுத்திக்கொள்ளப் போராடுகிறாய்!

அகோரக் குணங்காட்டும் கத்தல்களாலும்

ஆவேசம் மென்றுதின்னும் மெளனத்தாலும்

சுள்ளென்று காட்டும் முகத்திருப்பங்களாலும்

சூழ்ந்து நிற்கும் உறவுகளைச் சோர்வுறச்செய்கிறாய்!

மலச்சிக்கல் கொண்டவனை விடவும்

அதீதமான அசெளகரியத்துடன்

மனச்சிக்கல் கொண்டு தவிப்புடன் நெளிகிறாய்!

நிர்வாணமாய் நிற்பவனிடத்தில் பிடுங்க எதுவுமற்று

விரக்தியுடன் திரும்ப யத்தனிக்கிறேன்,

நீயோ வழக்கத்துக்கு மாறாக

என்னிடம் எதையோ கேட்டு என் பதிலுக்காய்

என் முகம்பார்த்துக் காத்திருக்கிறாய்!