30 June 2024

பூக்கள் அறிவோம் (101-110)

நீண்ட இடைவேளைக்குப் பிறகு 'பூக்கள் அறிவோம்' தொடர்கிறது. இந்தப் பதிவில் ஆஸ்திரேலியாவைத் தாயகமாகக் கொண்ட சில தாவரங்கள் இடம்பெறுகின்றன. 


101.  நியூசௌத் வேல்ஸ் கிறிஸ்துமஸ் பூக்கள் 

(Ceratopetalum gummiferum)



வசந்தகாலத்தில் (செப்டம்பர், அக்டோபர், நவம்பர் மாதங்களில்) வெள்ளைநிறத்தில் குட்டிக்குட்டியாய் அபரிமிதமாய்ப் பூக்கும் பூக்கள் அழகுதான் என்றாலும் அவை முதிர்ந்து உதிர்ந்தபின் வளர்ந்து சிவப்பாக மாறும் புல்லிவட்டம்தான் செடிக்குக் கூடுதல் கவர்ச்சி. விதைகளைப் பொத்திப் பாதுகாக்கும் அவற்றைப் பார்க்கும்போது ஐந்து இதழ்களைக் கொண்ட பூக்களைப் போலவே இருக்கும். இதோ படத்தில் இருப்பதும் அப்படியான பூவடி இலைகளே. இவை பூக்கள் அல்ல என்பதை சத்தியம் செய்தாலும் எவராலும் எளிதில் நம்பமுடியாது. 

ஆஸ்திரேலியாவைத் தாயகமாகக் கொண்ட இத்தாவரம் நியூ சௌத் வேல்ஸ் மாநிலத்தில்தான் அதிகம் என்பதாலும், கிறிஸ்துமஸ் சமயத்தில் அதாவது டிசம்பர் மாதவாக்கில் செடிமுழுவதும் செக்கச்செவேலென்று காட்சிதருவதாலும் இதற்கு நியூசௌத் வேல்ஸ் கிறிஸ்துமஸ் புதர் (New south wales Christmas bush), அல்பேரியின் சிவப்பு (Albery’s Red) என்ற செல்லப்பெயர்கள் உண்டு. செடியை ஒடித்தால் கோந்து வெளிப்படும் என்பதால் gummiferum என்றும் பெயர். பூக்களைப் போன்ற அழகும் வசீகரமும் வாடா தன்மையும் கொண்டிருப்பதால் பூங்கொத்துகளில் பெருமளவு இடம்பெறுகின்றன.

102. லெப்டோஸ்பெர்மம்

(Leptospermum)




ஆஸ்திரேலியாவின் ஆரம்பகால ஐரோப்பியக் குடியேறிகள் இதன் இலைகளின் எலுமிச்சை போன்ற மணத்தால் கவரப்பட்டு இதன் இலைகளைப் பயன்படுத்தி மூலிகைத்தேநீர் தயாரித்தக் காரணத்தால் இதற்கு தேநீர் மரம் (tea tree) என்ற பெயராகிவிட்டது. 

கிரேக்க மொழியில் leptos என்றால் மிருதுவான என்றும் sperma என்றால் விதை என்றும் பொருள். இவற்றில் நூற்றுக்கணக்கான வகைகள் உள்ளன. அவற்றுள் பெரும்பான்மையானவை ஆஸ்திரேலியாவையும் சில நியூசிலாந்து மற்றும் தெற்காசிய நாடுகளையும் தாயகமாகக் கொண்டவை. எளிதில் வாடாத மற்றும் உதிராத தன்மையால் இப்பூக்கள் பண்டிகை, விழாக்களின்போது பூ அலங்காரங்களில் இடம்பெறுகின்றன. இச்செடிகள் பூக்களின் அழகுக்காகவும் தேன் உற்பத்திக்காவும் பெருமளவில் வளர்க்கப்படுகின்றன. இப்பூக்களிலிருந்து கிடைக்கும் தேனில் கணிசமான அளவு methylglyoxal எனப்படும் பாக்டீரியா கிருமிகளை எதிர்க்கும் வேதிப்பொருள் இருக்கிறதாம்.  

103. க்ரீவிலியா பூக்கள்

(Grevillea)





ஆஸ்திரேலியாவையும் அக்கம்பக்கமுள்ள நியூகினி, நியூ கலடோனா, இந்தோனேஷியா போன்ற தீவுகளையும் தாயகமாகக் கொண்டது க்ரீவிலியா இனம். இதழ்களற்ற மலர் இது. தோற்றம் காரணமாக Spider flower, tooth brush flower என்றெல்லாம் குறிப்பிடப்படுகிறது. தோட்டக்கலையில் பெருத்த ஈடுபாடு கொண்ட பிரித்தானிய ஆட்சியாளர் Charles Francis Greville அவர்களை சிறப்பிக்கும் விதமாக இதற்கு Grevillea எனப் பெயரிடப்பட்டதாம்.  ஏராளமான வண்ணங்களில் வருடமுழுவதும் பூத்துக்குலுங்கும் Grevillea இனத்தில் எளிதாக கலப்புவகையை உருவாக்க முடியும் என்பதால் அநேக வகைகள் உருவாகியுள்ளன.

க்ரீவிலியாவில் தரைத்தாவரம், புதர்ச்செடி, குத்துச்செடி, மரம் என பல வகை உண்டு. வசீகர வண்ணமும் வடிவமும் கொண்ட இவற்றால் தோட்டங்கள் அழகுபெறுவதோடு, ஏராளமான பூந்தேனைத் தன்னகத்தே கொண்டுள்ளதால் தேனீக்களும் தேனுண்ணும் பறவைகளும் தேடிவந்து தோட்டத்திற்கு மேலும் அழகுசேர்க்கும். இப்பூக்களோடு சிறிது தண்ணீர் சேர்த்து பழச்சாறு போல பூஞ்சாற்றை அருந்துவது பூர்வகுடி மக்களின் பாரம்பரியப் பழக்கங்களுள் ஒன்றாம். இதன் தித்திப்பு காரணமாக Bush lollies என்ற செல்லப்பெயரும் இதற்கு உண்டு. 

104. பிரமாண்ட ஈட்டி லில்லி

(Giant spear lily)



Doryanthes என்பதற்கு அபூர்வமான ஈட்டிச்செடி என்று அறிந்தோம். 1870-களில் குவீன்ஸ்லாந்தின் முதல்வராயிருந்த Sir Arthur Hunter Palmer நினைவாக இதற்கு palmeri என்று பெயரிடப்பட்டதாம். சுமார் 5 மீட்டர் உயரத்தண்டில் உச்சியில் செக்கச் செவேலென்று வரிசையாய் மலரத்தொடங்கும் பிரமாண்ட ஈட்டி லில்லிப்பூக்கள். பிரமாண்ட லில்லிப்பூவின் தண்டு போல இது உறுதியாக செங்குத்தாக நிற்காது வளைந்துவிடும். இதன் வண்ணத்தால் ஈர்க்கப்பட்டு வரும் பறவைகள் மூலம் மகரந்தச் சேர்க்கை நடைபெறுகிறது. பழங்காலத்தில் இப்பூக்களின் இதழ்களையும் செடியின் வேர்க்கிழங்கையும் பூர்வகுடி மக்கள் உணவாகப் பயன்படுத்தினர்.

105. இலவாரா தீச்சுவாலை பூக்கள்

 (Illawarra flame tree)



ஆஸ்திரேலியாவின் கிழக்குக் கடற்கரைப் பகுதியைப் பூர்வீகமாய்க் கொண்ட இம்மரம் 40 மீட்டர் உயரம் வரை வளரக்கூடியது. குளிர்கால இறுதியில் இலைகளை முழுக்க உதிர்த்தபின் பூக்களைப் பூக்கத் துவங்கும்.  மரம் முழுவதும் செம்மலர்களால் போர்த்தி தொலைவிலிருந்து பார்க்கும்போது தீச்சுவாலை படர்ந்தாற்போன்ற தோற்றம் காட்டுவதால் இதற்கு flame tree என்ற பெயர் மிகப்பொருத்தமே. 


பூக்கள் அளவில் சிறியதாய் ஐந்து இதழ்களுடன் கோவில்மணி வடிவில் காட்சியளிக்கும். இதன் முற்றிய காய்க்குள்ளிருக்கும் சோளம் போன்ற விதைகளை பூர்வகுடி மக்கள் வறுத்துத் தின்பதுண்டாம். முற்றிய காயின்மேல் காணப்படும் சுணப்பு அரிப்பையும் எரிச்சலையும் உண்டாக்கும் என்பதால் அவற்றைக் கையாளும்போது மிகுந்த கவனம் தேவை. 

106. துலிப் ஸாட்டின் பூக்கள்

 (Tulip satinwood)


ஆஸ்திரேலியாவின் மழைக்காடுகளைச் சார்ந்தவை துலிப் ஸாட்டின்வுட் மரங்கள் 20 மீட்டர் உயரம் வரை வளரக்கூடியவை. சிவப்பு நிறத்தில் கொத்துக்கொத்தாய்ப் பூக்கும் பூக்களின் அழகுக்காகவும், உறுதிவாய்ந்த மரக்கட்டைகளுக்காகவும் பல இடங்களில் வளர்க்கப்படுகின்றன. வறட்சி, குளிர் போன்ற கடுமையான சூழலையும் தாங்கும் இயல்பாலும், ஆக்கிரமிப்பற்ற வேர்களைக் கொண்டிருப்பதாலும் ஆஸ்திரேலியாவில் சாலையோர நிழல்தரும் மரங்களாகவும் பராமரிக்கப்பட்டுவருகின்றன. 

மாமர வகையைச் சார்ந்த இதுவும் ஒரு பால்மரமே. இதன் இலைகளும் பூக்களும் மாமரத்தை ஒத்திருந்தாலும் பழங்கள் பார்ப்பதற்கு இலந்தை போல செவேலென்று சிறியதாகவும் மினுமினுப்புடனும் காட்சியளிக்கின்றன. பூக்கும் மற்றும் காய்க்கும் பருவத்தில் தேனீக்களும் பறவைகளும் மரத்தை எப்போதும் வலம்வந்தபடியிருக்கும்.

107. ஆஸ்திரேலிய வயலட் 

Australian violet (Viola hederacea)

ஆஸ்திரேலியாவைத் தாயகமாகக் கொண்ட இது ஒரு தரைபடர் தாவரம். தரையிலிருந்து 10 – 15 செ.மீ. உயரமே வளரக்கூடியது. Australian native violets, ivy-leaved violets, Australian tufted violets என்றெல்லாம் குறிப்பிடப்படுகிறது. இதுவும் பான்சியும் violaceae என்னும் ஒரே குடும்பத்தைச் சேர்ந்தவை. இதன் அறிவியல் பெயர் viola hederacea என்பதாகும். லத்தீன் மொழியில் viola என்றால் ஊதா என்றும் Hedera என்றால் படர்கொடி என்றும் பொருள்.

வல்லாரைக் கீரை போன்ற வடிவத்தில் இலைகளும் இலைமட்டத்துக்கு மேலே நீண்டு வளர்ந்த மெல்லிய காம்பில் பூத்திருக்கும் வெள்ளை ஊதா நிறப் பூக்களும் தோட்டத்திற்கு அழகு சேர்ப்பவை. அதிக தண்ணீர் தேவைப்படாமலேயே நன்கு படர்ந்து படர்ந்து வளரக்கூடியது. பூக்கள் உண்ணத் தகுந்தவை என்பதால், சாலட் போன்றவற்றில் சேர்த்துக் கொள்ளப்படுகின்றன.  

108. சர்ப்பக்கொடிப்பூ

(Snake vine)


மயக்கும் மஞ்சள் வண்ணத்தில் அழகிய பூக்களைக் கொண்டு, snake vine, Climbing guinea flower, golden guinea vine, gold guinea plant என்றெல்லாம் வசீகரப் பெயர்கள் கொண்ட படர்கொடியினம் இது. ஆஸ்திரேலியாவைத் தாயகமாகக் கொண்ட Hibbertia இனத்தில் சுமார் 150 வகை உள்ளன. இங்கிலாந்தைச் சேர்ந்த வியாபாரியும் அரசியல்வாதியும் தாவரவியல் ஆர்வலருமான George Hibbert அவர்களை சிறப்பிக்கும்வண்ணம் இப்பேரினத்துக்கு Hibbertia என்ற பெயரிடப்பட்டுள்ளது.

பூக்கள் என்றால் பெரும்பான்மையானவற்றுக்கு நறுமணம் உண்டு. சில பூக்கள் மணமற்று இருக்கும். ஆனால் இந்தக் கொடியின் பூக்களோ மூத்திர வீச்சம் போன்ற விரும்பத்தகாத வாடையை வெளியிடும் என்பது வியப்பான தகவல். ஆனாலும் பூக்களின் அழகுக்காக சுவர்களிலும் வேலிகளிலும், நன்கு வளர்ந்த மரங்களிலும் படரவிட்டுப் பேணப்படுகின்றன.

ஆரஞ்சு நிறத்தில் அழகாக சதைப்பற்றுடன் இருக்கும் இதன் பழங்கள் தின்னத்தூண்டும் என்றாலும் தின்பது பெரும் ஆபத்து. பழத்தை வாயில் போட்ட அடுத்த நிமிடமே உதடு நாக்கு எல்லாம் வெந்து புண்ணாகிவிடும்.

எது எப்படியிருந்தால் என்ன? 1999-ஆம் ஆண்டு ஆஸ்திரேலியாவில் வெளியான அஞ்சல் தலையில் இடம்பெற்ற சிறப்பு இப்பூக்களுக்கு இருக்கிறதே. 

109. மென்கம்பளிப் பூ

(Flannel flower)


சிட்னியை ஒட்டிய புதர்க்காடுகளில் அபரிமிதமாகக் காணப்படும் தாவரம் இது. பூக்கள் தொடுவதற்கு மென்கம்பளி போன்று மெத்தென்று இருப்பதால் இதற்கு flannel flower என்ற பெயரானது. பூ மட்டுமல்ல.. இலை, காம்பு உள்ளிட்ட எப்பாகமும் தொடுவதற்கு மென்கம்பளித்தன்மை கொண்டவை. ஆஸ்திரேலியாவைத் தாயகமாகக் கொண்ட இத்தாவரம் apiaceae என்னும் குடும்பத்தைச் சேர்ந்தது. கேரட் செடிகளும் இதே குடும்பத்தைச் சேர்ந்தவைதாம். Actinotus என்றால் கிரேக்க மொழியில் சக்கரத்தின் ஆரக்கால்கள் என்றும் helianthi என்றால் சூரியனைப் போன்றது என்றும் பொருளாம்.

வீட்டுத் தோட்டங்களில் அழகுக்காக வளர்க்கப்படும் இவை, பூங்கொத்துகளிலும் இடம்பெறுகின்றன. பார்ப்பதற்கு மற்றப் பூக்களைப் போல கவர்ச்சிகரமான நிறம் இப்பூக்களுக்குக் கிடையாது. இங்கு பூவென்று குறிப்பிடுவது பூவடி இலைகளே. அவை பெரும்பாலும் சாம்பல், சாம்பல் பச்சை, வெளிர்பச்சை நிறங்களில் காணப்படும். அதுவே அவற்றின் தனித்துவம் எனலாம்.  

110. பேப்பர் டெய்ஸி

Paper daisy 



காகிதம் போன்று மொடமொடப்பாகவும், எளிதில் வாடாத தன்மையாலும் டெய்ஸி பூக்கள் போன்ற தோற்றத்தாலும் இதற்கு பேப்பர் டெய்ஸி என்னும் பெயர் வந்தது. ஆஸ்திரேலியாவைத் தாயகமாகக் கொண்ட பேப்பர் டெய்ஸி பூக்கள், வெள்ளை, சிவப்பு, ஆரஞ்சு, மஞ்சள் வண்ணங்களில் மலர்ந்து தோட்டங்களை அழகுபடுத்துகின்றன. பொன்மஞ்சள் வண்ண பேப்பர் டெய்ஸிக்கு everlasting golden daisy, straw flower என்ற செல்லப்பெயர்களும் உண்டு. 

Xerochrysum என்பதற்கு கிரேக்க மொழியில் உலர்ந்த தங்கம் என்றும் bracteatum என்பதற்கு பூவடி இலை என்றும் பொருளாம். வண்ண வண்ணமாய்த் தோற்றமளிப்பதெல்லாம் பூவடி இலைகளே அன்றி உண்மையான பூவிதழ்கள் அன்று. மலரின் மத்தியில் நூற்றுக்கணக்கில் குழுமியிருப்பவைதாம் உண்மையான பூக்கள். விதைகள் மூலமாகவும் கிளைகளை வெட்டி நடுவதன் மூலமாகவும் புதிய செடிகள் உருவாகும் என்பதால் கலப்பினங்கள் உருவாக்குவது எளிது. பூங்கொத்துகளையும் பூச்சாடிகளையும் அலங்கரிக்க பேப்பர் டெய்ஸிகள் வியாபார ரீதியாகப் பெருமளவில் வளர்க்கப்படுகின்றன.


(தொடரும்)


20 June 2024

சின்னஞ்சிறிய வண்ணப்பறவைகள்

ஆஸ்திரேலியாவின் அழகுக் குருவிகளுள் கோல்டியன் குருவியினமும் ஒன்று. பச்சைநிற முதுகும், ஊதா நிற மார்பும், மஞ்சள் வண்ண வயிறும், சிவப்பு, ஆரஞ்சு, மஞ்சள், கருப்பு என மாறுபட்ட வண்ணங்களில் முகமும் என  கண்ணைப்பறிக்கும் அழகு வண்ணக் குருவிகள் கோல்டியன் குருவிகள். 


1. கருந்தலை கோல்டியன் குருவி


2. செந்தலை கோல்டியன் குருவி

3. ஆரஞ்சுத்தலை கோல்டியன் குருவி


பார்ப்பதற்கு ஒரே மாதிரி வண்ணமயமாய்க் காட்சியளித்தாலும் இவற்றுள் ஆண் பெண் பேதமறிதல் எளிது. மார்பில் அடர் ஊதா வண்ணம் ஆண் குருவியையும் வெளிர் ஊதா வண்ணம் பெண் குருவியையும் அடையாளங்காட்டும். பொதுவாகவே பெண்ணை விடவும் ஆணின் வண்ணங்கள் அடர்த்தியாகவும் பளிச்சென்றும் இருக்கும். 

4. கருந்தலை கோல்டியன் குருவி இணை

1844-ஆம் ஆண்டு பிரித்தானிய பறவை வல்லுநர் ஜான் கோல்ட் (John Gould) தன் மனைவி Elizabeth Gould நினைவாக இப்பறவையினத்துக்கு Amadina gouldiae என்று பெயரிட்டார். திருமதி எலிசபெத் கோல்ட் வரைகலையில் மிகுந்த தேர்ச்சி பெற்றவர் என்பதும் ஜான் கோல்ட் எழுதிய பறவைகள் குறித்த நூல்களுக்கு தத்ரூபமாக விளக்கப்படங்கள் வரைந்தவர் என்பதும் குறிப்பிடத்தக்கது.

5. திருமதி எலிசபெத் கோல்ட்

கோல்டியன் குருவிகளின் பொதுவான உணவு புல்விதைகளும் தானியங்களும் என்றாலும் உடலுக்குத் தேவையான புரதச்சத்தை எளிதில் பெறுமுகமாக குஞ்சுகளுக்கு புழு பூச்சிகளை ஊட்டி வளர்க்கும். பெரும்பாலான நேரம் இவை கூட்டம் கூட்டமாக புல்வெளியில் மேய்வதைக் காணமுடியும். முட்டையிடும் பருவத்தில் உயரமான மரங்களின் பொந்துகளிலோ மரங்களிலுள்ள கரையான் புற்றின் துவாரங்களிலோ கூடு கட்டி முட்டையிடும். ஒரே இடத்தை பல கோல்டியன் குருவிகள் எல்லைத் தகராறு இல்லாமல் பங்கிட்டுக்கொள்ளும்.

6. கருந்தலை கோல்டியன் குருவி ஆண்

கோல்டியன் குருவிகள் ஒரு ஈட்டுக்கு நான்கு முதல் எட்டு முட்டைகள் வரை இடும். முட்டைகளை ஆண் பெண் இரண்டுமே பகலில் மாறி மாறி அடைகாக்கும். ஆனால் இரவில் பெண் மட்டுமே அடைகாக்கும். 13 நாட்களுக்குப் பிறகு குஞ்சுகள் பொரிந்துவரும். தாய் தந்தை இரண்டுமே குஞ்சுகளுக்கு இரையூட்டி வளர்க்கும். 

குஞ்சுகளின் வாய் பெரிதாகவும் வாயைச்சுற்றி பளீர் நீல வண்ணத்தில் நான்கு பெரிய புள்ளிகளும் காணப்படும். இருட்டான பொந்துக்குள் குஞ்சுகளின் வாயில் சரியாக இரையை ஊட்டுவதற்காக இயற்கை அளித்த சிறப்பு இது. 

21 நாட்களுக்குப் பிறகு பறவைக்குஞ்சுகள் பறக்கத் தொடங்கியதும் கூட்டை விட்டு வெளியேறும். 

7. கருந்தலை கோல்டியன் குருவி பெண்

கோல்டியன் குருவிகளுக்கு ஒரு நாளைக்குப் பலமுறை நீரருந்தும் அவசியம் இருப்பதால் பெரும்பாலும் சதுப்புநிலக் காடுகளையும், நீர்நிலைகளையும் ஒட்டிய மரங்கள் அடர்ந்த புல்வெளிகளையே வசிப்பிடங்களாகத் தேர்ந்தெடுக்கின்றன. மற்றக் குருவியினங்களோடும் இணைந்து வாழக்கூடியவை. ஒரு கூட்டத்தில் குறைந்தபட்சம் ஆயிரம் குருவிகளாவது காணப்படும். இவற்றின் ஆயுட்காலம் சுமார் ஐந்தாண்டுகள்.

8. கருந்தலை கோல்டியன் குருவிகள்

வளர்ப்பு கோல்டியன் குருவிகளுள் தற்போது அசல் அல்லாது பல கலப்பினங்கள் உருவாக்கப்பட்டு நிறமாற்றங்கள் அதிகரித்துள்ளன. கண்ணைப் பறிக்கும் வண்ணங்களே இவற்றின் முதல் எதிரி. 

9. செந்தலை கோல்டியன் குருவி

இயல்சூழலில் இவற்றைப் பாதுகாக்கும் வனச்சட்டம் 1981-ல் அமல்படுத்தப்படுவதற்கு முன்பு இவற்றின் எண்ணிக்கை இலட்சக் கணக்கில் இருந்துள்ளது. அழகு மற்றும் வசீகரம் காரணமாக கணக்கு வழக்கில்லாமல் உலக நாடுகள் பலவற்றுக்கும் ஏற்றுமதி செய்யப்பட்ட காரணத்தால் இவற்றின் எண்ணிக்கை குறைந்துகொண்டே வந்துவிட்டது. 1934 – 1939 வருடங்களில் மட்டும் ஏற்றுமதியான கோல்டியன் குருவிகளின் எண்ணிக்கை சுமார் 25,000 இருக்கலாம். இப்போது ஆஸ்திரேலியாவின் வடக்கே குறிப்பிட்ட பகுதிகளில் மட்டுமே காணப்படும் இவற்றின் மொத்த எண்ணிக்கை 2,500 -க்கும் குறைவு என்பது அதிர்ச்சியளிக்கும் தகவல். 

ஆஸ்திரேலியாவில் மிதமிஞ்சிப் பெருகியுள்ள வளர்ப்பாரற்ற ஆடு, மாடு, குதிரை போன்ற விலங்கினங்களால் குறிப்பிட்ட காக்கட்டூ வகை புற்கள் மேயப்பட்டுவிடுவதால் அப்புல்விதைகளை முக்கிய உணவாகக் கொண்ட கோல்டியன் குருவியினத்தின் எண்ணிக்கையும் சரிந்துவருவதாக அறிவித்துள்ளன ஆய்வு முடிவுகள்.  

10. செந்தலை கோல்டியன் குருவி

கோல்டியன் குருவிகள் பன்னாட்டு இயற்கை பாதுகாப்பு சங்கத்தால் அருகிவரும் உயிரினமாக அறிவிக்கப்பட்டுள்ளன. இவற்றைப் பிடிப்பதோகடத்துவதோஆஸ்திரேலிய வனப்பாதுகாப்புச் சட்டத்தின்படி கடும் தண்டனைக்குரியக் குற்றமாகும். 

(படங்கள் அனைத்தும் சிட்னியிலுள்ள உயிரியல் பூங்காவிலும் பறவைக் காப்பகத்திலும்  என்னால் எடுக்கப்பட்டவை)

22 May 2024

பெருங்களிற்றுச் செவியோ? சுளகோ?

தோட்டத்துப் பிரதாபம் - 29 


மொறுமொறுவென்று சிப்ஸ் போல வறுத்த சேப்பங்கிழங்கு என்றால் என் பிள்ளைகளுக்கு உயிர். சேப்பங்கிழங்கை தண்ணீர் விடாமல் குக்கரில் வேகவைத்துத் தோலுரித்து மெல்லிசாய் வட்டவட்டமாக வெட்டி மிளகாய்த்தூள், மஞ்சள் தூள், உப்பு, சோம்புத்தூள், கொஞ்சமாய் க.மாவு அல்லது அரிசி மாவு தூவிப் பிசறி எண்ணெயில் shallow fry-ஆக பொரித்தெடுக்க வேண்டும். இது என் புகுந்த வீட்டுச் செய்முறை. 


என் அம்மாவுடைய செய்முறை வேறு.
சேப்பங்கிழங்கை வேகவைத்துத் தோலுரித்துத் துண்டுகளாக்கி மிளகாய்த்தூள், மஞ்சள் தூள், உப்பு இவற்றோடு தேங்காயும் சோம்பும் சேர்த்தரைத்த விழுதும் சேர்த்து  நிறைய எண்ணெய் விட்டு சுருள வதக்கி சாந்தோடு சற்று சொதசொதப்பாக இருக்கும் அதுதான் எனக்கு மிகவும் பிடித்தது.

சேப்பங்கிழங்கை என் அம்மா செய்வது போல ஒரு தடவை வறுத்து வைத்தபோது கணவர், பிள்ளைகள் யாருக்குமே இறங்கவில்லை. அதனாலென்ன? நானே எல்லாவற்றையும் ஒரு கட்டு கட்டிவிட்டேன். :)

சென்னையில் இருந்தவரை, பிள்ளைகளுக்குப் பிடிக்கும் என்று அடிக்கடி சேப்பங்கிழங்கு வறுவல் செய்வேன். ஆஸ்திரேலியா வந்த பிறகு சேப்பங்கிழங்கு கிடைப்பதே குதிரைக் கொம்பாக இருந்தது. அப்படியே கிடைத்தாலும் யானை விலை குதிரை விலை இருந்தது. (குதிரைக் கொம்பு, குதிரை விலை... ஹாஹாஹா...) எனவே சின்ன வெங்காய லிஸ்டில் சேப்பங்கிழங்கும் சேர்ந்துவிட்டது. (சின்ன வெங்காயம் கிலோ $16 & சேப்பங்கிழங்கு கிலோ $18). 

சொந்த வீடு என்றானபின், நமக்குதான் கையகலத் தோட்டம் இருக்கிறதே காய்கறி விளைவிப்போம் என்ற முடிவுக்கு வந்த பிறகு சேப்பங்கிழங்கை நாமே விளைவித்தால் என்ன என்ற எண்ணம் வந்தது. கடையில் கால்கிலோ அளவுக்கு சேப்பங்கிழங்கு வாங்கிவந்தேன். கட்டைவிரல் சைஸில் குட்டிக் குட்டியாகப் பதினைந்து கிழங்குகள். தோட்டத்தில் ஒரு இடம் பார்த்து ஒரு சாண் இடைவெளியில் கிழங்குகளை நட்டுவைத்தேன். விளைந்தால் லாபம், போனால் ஐந்து டாலரோடு போகட்டும் என்று விட்டுவிட்டேன். கொஞ்ச நாளிலேயே கிழங்குகள் முளைவிடத் தொடங்கின. ஏழெட்டு முளைத்தன. விதைத்ததில் பாதி! வளர வளர எனக்கு மகிழ்ச்சி தாங்கவில்லை. கிழங்குகள் கிடைக்கும் என்பது ஒரு பக்கம் மகிழ்ச்சி என்றால் காற்றிலாடும் சேம்பின் இலைகளைக் காண்பதே பெருமகிழ்ச்சியாக இருந்தது. காற்றில் அசையும் சேம்பின் இலைகள் யானையின் காதுகளைப் போன்றிருப்பதான சங்க இலக்கிய உவமை நினைவுக்கு வந்து முறுவல் உண்டாக்கியது.



 

சிலம்பிற் சேம்பினலங்கல் வள்ளிலை

பெருங்களிற்றுச் செவியின் மான

குறுந்தொகைப் பாடலொன்றில் மலைச்சேம்பின் பெரிய இலைகளை, பெரிய யானையின் காதுகளைப் போன்று தோன்றும்படி அசைக்கச்செய்யும் குளிர்ந்த வாடைக்காற்று வீசும் முன்பனிக்காலத்தில் என்னை பிரிவுத்துன்பத்தில் நடுங்கவைத்துவிட்டு என் தலைவன் என்னைப் பிரிந்து தன்னுடைய நாட்டுக்குப் போகப் போகிறானே என்று தலைவி தோழியிடம் புலம்புவதாக உரைக்கிறார் கிள்ளிமங்கலக் கிழார் என்னும் புலவர். 

சேம்பின் இலை ஒரு புலவருக்கு யானையின் காதுகளைப் போலத் தோன்றினால் இன்னொரு புலவருக்கு அவை சுளகுகளைப் போன்று தோன்றுகின்றன. சுளகா? அது என்ன என்பவர்களுக்கு முறத்தின் இன்னொரு வடிவம்தான் சுளகு. அடிப்புறம் அகன்றும் வாய்ப்புறம் குறுகியும் இருக்கும். பேச்சுவழக்கில் ‘சொலவு, சொளகு, சொலகு’ என்றெல்லாம் குறிப்பிடப்படும்.  

சுளகும் முறமும்


பாடுகம் வா வாழி தோழி வயக்களிற்றுக்

கோடுலக்கையாக நற்சேம்பினிலை சுளகா

வாடுகழை நெல்லை யறையுரலுட் பெய்திருவாம்

பாடுகம் வாவாழி தோழி நற்றோழி பாடுற்று

'தோழீ! வாழி! நாம் பாடுவோம் வா! அசைந்து உதிரும் மூங்கில் நெல்லை சேம்பின் இலையாகிய சுளகில் அள்ளி, பாறையாகிய உரலிலே இட்டு, வலிமை மிகுந்த யானைத்தந்தமாகிய உலக்கையால் குத்தி வள்ளைப்பாட்டுப் பாடுவோம் வா!' என்று தலைவி தோழியிடம் பாடுவதாக குறிஞ்சிக்கலியில் கபிலர் பாடியுள்ளார். 

வள்ளைப்பாட்டு என்பது இரண்டு பெண்கள் மாறி மாறி உரலில் உலக்கையால் தானியங்களைக் குத்தும்போது வளையல்கள் குலுங்கக் குலுங்க ஒத்திசைவோடு பாடும் பாட்டு. உலக்கையால் இடிக்கும்போது பாடும் பாட்டு என்றவுடன் பள்ளிக்காலத்தில் பயின்ற, பாரதியின் குயில்பாட்டு மனன வரிகள் மளமளவென்று நினைவுக்கு வருகின்றன. 

ஏற்றநீர்ப் பாட்டின் இசையினிலும் நெல்லிடிக்கும்

கொற்றொடியார் குக்குவெனக் கொஞ்சும் ஒலியினிலும்

          சுண்ண மிடிப்பார்தம் சுவைமிகுந்த பண்களிலும்

          பண்ணை மடவார் பழகுபல பாட்டினிலும்

வட்டமிட்டுப் பெண்கள் வளைக்கரங்கள் தாமொலிக்கக்

கொட்டி யிசைத்திடுமோர் கூட்டமுதப் பாட்டினிலும்

          வேயின் குழலொடு வீணைமுதலா மனிதர்

          வாயினிலுங் கையாலும் வாசிக்கும் பல்கருவி

நாட்டினிலுங் காட்டினிலும் நாளெல்லாம் நன்றொலிக்கும்

பாட்டினிலும் நெஞ்சைப் பறிகொடுத்தேன் பாவியேன்.

சுண்ணம் இடிப்பார்தம் சுவைமிகுந்த பண்தான் வள்ளைப்பாட்டு. சுண்ணம் என்றால் நறுமணப்பொடி.

சேம்பு, சுளகு என்று ஆரம்பித்து வள்ளைப்பாட்டு, சுண்ணம் என்று போய்விட்டேன் பாருங்க.

பார்வையற்றவர்கள் யானையைத் தடவிப் பார்த்து யானையின் உருவம் எத்தகையது என்று சொல்வதாக ஒரு கதை உண்டு. அந்தக் கதையில் யானையின் காதுகளைத் தடவிப் பார்த்த ஒருவன் யானை முறத்தைப் போன்று இருக்கும் என்பான். யானையின் காதுகளுக்கு முறம் நல்ல உவமை. சுளகு இன்னும் எவ்வளவு அழகான பொருத்தமான உவமை. 

அடுத்து சேம்பின் அழகை வர்ணிக்கும் ஒரு அகநானூற்றுப் பாடலின் வரிகள்.

வயிரத்து அன்ன வையேந்து மருப்பின்

வெதிர்வேர் அன்ன பரூஉமயிர்ப் பன்றி

பறைக்கண் அன்ன நிறைச்சுனை பருகி

நீலத்து அன்ன அகலிலைச் சேம்பின்

பிண்டம் அன்ன கொழுங்கிழங்கு மாந்தி

வைரம் போன்ற கூரிய மேல்நோக்கிய பற்களையும் மூங்கில் வேரினை ஒத்த பருத்த மயிரினையும் உடைய பன்றி, நீலமணியை ஒத்த நீல நிறமுள்ள அகன்ற இலைகளையுடைய சேம்பின் உருண்டு திரண்ட கிழங்குகளை ஏராளமாய்த் தின்கிறது என்று பாடுகிறார் பரணர்.  


 

குழற்காற் சேம்பின் கொழுமடல் அகலிலை

என்கிறது மற்றொரு அகநானூற்றுப் பாடல். 

துளையுள்ள குழல் போன்ற தண்டில் ஒட்டிக்கொண்டிருக்கும் மடல் போன்ற அகன்ற இலையை உடைய சேம்பு’ என்று வர்ணிக்கிறார் பாவைக் கொட்டிலார் என்ற புலவர். 


இந்தப் புலவர்கள்தாம் எவ்வளவு கூர்நோக்காளர்கள்! இயற்கையின் நுட்பங்களை அழகாக ஊன்றிக் கவனித்து, ஒத்த இயல்நிகழ்வுகளோடு ஒப்புமைப்படுத்தி, இலக்கியநயத்தோடு கவிபாடி காலத்தால் அழியாதப் பொக்கிஷங்களாகத் தந்துள்ளார்களே. 

சேம்பின் கிழங்கையும் இலையையும் சங்கப்புலவர்கள் பாடியிருப்பதை வைத்தே அது தமிழகத்தில் பல காலமாக இருப்பது தெரிகிறது. ஆம், இன்று உலகம் முழுவதும் பரவலாகப் பயன்படுத்தப்படும் சேம்பு இந்தியத் துணைக்கண்டத்தையும் தென்கிழக்காசிய நாடுகளையும் பூர்வீகமாகக் கொண்டது. Colocasia esculenta என்ற தாவரப் பெயர் உடைய சேம்பு ஆங்கிலத்தில் Taro, Arvi என்ற பெயர்களால் குறிப்பிடப்படுகிறது. மிகப்பெரிய காட்டுச்சேம்பு வகைக்கு ‘Elephant’s ear’ என்றே பெயரிடப்பட்டுள்ளது. 

சேப்பங்கிழங்குக்கும் அதன் இலைக்கும் பற்பல மருத்துவக்குணங்கள் இருப்பதால் ஆயிரக்கணக்கான ஆண்டுகளாக உலக நாடுகள் பலவற்றிலும் உருளைக்கிழங்குக்கு அடுத்தபடியாக உணவுப்பயன்பாட்டில் சேம்பு இருந்துவருகிறது. ஆப்பிரிக்க நாடான நைஜீரியா வருடத்துக்கு 18 மில்லியன் டன் கிழங்குகளை விளைவித்து, இன்று உலகளவில் சேம்பு உற்பத்தியில் (46%) முதலிடம் வகிக்கிறது.



ஃபிஜியில் ஆண்டுதோறும் சித்திரா பவுர்ணமி அன்று ‘சேம்பு தினம்’ கொண்டாடப்படுகிறது. ஹவாய் தீவு மக்களிடையே சேம்புக்கு கலாச்சார முக்கியத்துவம் உள்ளது. ஆனால் ஆஸ்திரேலியாவில் சேம்பு கட்டுப்படுத்தவேண்டிய களைப்பயிர் பட்டியலில் இடம்பெற்றுள்ளது. 

சேப்பங்கிழங்கை நாம் பெரும்பாலும் வறுத்தும் குழம்பில் சேர்த்தும் சாப்பிடுவோம். மற்ற நாடுகளில் வேகவைத்து மசித்தும், இறைச்சி அல்லது மீன் போன்ற அசைவ உணவுகளுடன் சமைக்கப்பட்டும், சூப், கூட்டு, கேக், கட்லெட் போன்றவையாகவும் உண்ணப்படுகிறது. சேம்பில் Calcium oxalate என்னும் வேதிப்பொருள் உள்ளது. இலையையோ கிழங்கையோ சமைக்காமல் தின்றால் அரிப்பும் நமைச்சலும் உண்டாக அதுவே காரணம். 

 


இப்போது தோட்டத்துக்கு வருகிறேன். ஒவ்வொரு இலையும் உண்மையிலேயே யானைக் காதை விஞ்சும் அளவுக்குப் பெரிது பெரிதாய் வளர்ந்து காற்றிலாடிக் களிப்பூட்டின. மழை நாட்களின்போது தாமரை இலை போல சேம்பின் இலைகளின் மீதும் நீர்த்திவலைகள் ஒட்டாமல் நின்றுகொண்டிருக்கும். காற்றில் இலைகள் அசையும்போது அவற்றின் கூடியிருக்கும் நீர்த்திவலைகள் பாதரசத்தைப் போல அங்குமிங்கும் உருள்வதும் குட்டிக் குட்டி முத்துக்களாகப் பிரிவதும் மீண்டும் ஒன்றுசேர்வதுமாக பார்க்க அவ்வளவு அழகாக இருக்கும். 



 


கிட்டத்தட்ட ஆறு மாதங்களுக்குப் பிறகுதான் அறுவடைக்காலம் என்று அறிந்துகொண்டபோது அவ்வளவு காலம் காத்திருக்கவேண்டுமே என்று ஆரம்பத்தில் கவலையாக இருந்தாலும் சேம்பிலைகளின் அழகையும் ஆட்டத்தையும் ரசித்துக்கொண்டிருந்ததில் காலம் ஓடியதே தெரியவில்லை.

இதற்கிடையில் சேம்பிலைகளை சமைக்கவும் செய்யலாம் என்று அறிந்துகொண்டு அதையும் முயற்சி செய்வோமே என்று நினைத்தேன். இதுவரை சேம்பின் இலையைச் சாப்பிட்டுப் பழக்கமில்லை. சாப்பிடலாமா என்று சந்தேகமாகவும் இருந்தது. சில கிழங்குகள் சாப்பிட்ட பிறகு அரிக்கும். சில கிழங்குகளைக் கையால் தொட்டாலே அரிக்கும். அதுபோல சேப்பங்கிழங்கு இலைகளைச் சாப்பிட்டுவிட்டு நாக்கு அரிப்பெடுத்தால் என்ன செய்வது என்ற பயந்தேன். இருந்தாலும் முயற்சி செய்து பார்ப்போமே என்று துணிந்து பரிசோதனை முயற்சியில் இறங்கிவிட்டேன். சேம்பிலை உசிலி. எல்லாம் யூட்யூப் உபயம்தான். சும்மா சொல்லக்கூடாது. மிகவும் அருமையாக இருந்தது. சேப்பங்கிழங்கு இலையை வைத்து சைவ மீன் வறுவல் என்றுகூட ஒரு ரெசிப்பி இருந்தது. இன்னும் முயற்சி செய்யவில்லை. ஆனால் உசிலி பிரமாதம்!

 


சேம்பிலை உசிலி

சேம்பின் இலைகள் பழுக்கத் தொடங்குவதுதான் அறுவடைக்காலத்தின் அறிகுறி. அப்போது தோண்டிப் பார்த்தால் ஏராளமான கிழங்குகள். முதல் ஈட்டிலேயே நல்ல விளைச்சல்! தாய்க் கிழங்குகள் நன்கு பருத்துப் பெரிதாகவும் அவற்றைச் சுற்றிலும் சற்றுச் சிறிய அளவில் ஆனால் நட்டுவைத்த அளவை விடவும் பெரிதாக ஏராளமான கிழங்குகள். சுமார் ஒன்றரை கிலோ இருக்கலாம். ஆசை தீர, கணவருக்கும் பிள்ளைகளுக்கும் சமைத்துக் கொடுத்தேன்.

 


தாய்க்கிழங்குகளை எடுத்துவைத்திருந்தேன். அளவில் மிகவும் பெரியனவாக இருந்ததாலும் அடிக்கிழங்கு என்பதாலும் அரிக்குமோ என்று பயம். சரி, மீண்டும் அவை முளைக்கிறதா என்று பார்ப்போம் என மறுபடியும் ஊன்றி வைத்தேன். 



என் எதிர்பார்ப்பு வீண்போகவில்லை. மளமளவென்று முளைத்து மறு ஆறு மாதத்தில் அடுத்த அறுவடை. இம்முறை நான்கு கிலோ. இதுவரை நான்கு முறை அறுவடை செய்திருக்கிறேன். போன தடவை ஐந்தாறு கிலோ இருக்கலாம். ஒவ்வொரு முறையும் விளைச்சலின் அளவு கூடிக்கொண்டே போகிறதே தவிர குறையவே இல்லை. இடப்பற்றாக்குறை காரணமாக, இந்த முறை இரண்டே இரண்டு கிழங்குகள்தான் விதைத்துள்ளேன். பார்ப்போம் எவ்வளவு கிடைக்கிறதென்று.

(பிரதாபங்கள் தொடரும்)