அலையும் மனதிற்கு ஆதரவாய்….

முடிவிலியாய் நீண்டுதொடரும்

கோடுநிறைப்  புள்ளிகளுக்கு நிகராக

மனப்பரப்பெங்கும் இறைந்துகிடக்கும்

எண்ணங்களின் விதைப்புகள்!

இண்டுகளிலும் இடுக்குகளிலும்

இறுகப்பற்றி வேர்விடும் ஆலமரமென

அழுந்திப் படரும் நினைவுகளின் முடிச்சுகளில்

முரண்பட்டு நிற்கும்

மனமுவந்த நிகழ்வுகளின் நெருடல்கள்!

விழிநீரின் வெம்மையில் வெந்தபடி வெளியேறும்

சில வைராக்கியங்களை விழுங்கத் தலைப்படும்

சொல்லொணாத் துயரம் விழுங்கி,

தொலைதூர அடர்வனமொன்றில்

துணையற்றுத் தனித்தொலிக்கும்

ஒற்றைப்பறவையின் சோகத்துக்கிணையாக

உள்ளாடும் உயிர்த்துடிப்பைச் சுமந்தபடி

அலையும் மனதிற்கு ஆதரவாய்….

நோக்கமெதுவுமற்றுத் திரிந்து

திசைமாறிச்சொரியும் அன்பின் சாரல்களும்,

அதில் திளைத்தபடி ஆசுவாசப்படுத்தும் 

அறிமுகமற்ற சில நட்புகளும்!