சொ. ஞானசம்பந்தன் ஐயாவின் பார்வையில் என்றாவது ஒரு நாள்

என்றாவது ஒரு நாள் என்னும் என் புத்தகத்திலும் என் மனத்திலும் நன்றிக்குரியவராய் நான் அடையாளம் காட்டியுள்ளவர் என் மதிப்புக்கும் மரியாதைக்கும் உரிய மாமனார் திரு.சொ.ஞானசம்பந்தன் அவர்கள். இலக்கியச்சாரல் என்னும் வலைப்பதிவில் எழுதிவரும் அவரே பதிவுலகில் மூத்த பதிவராக இருப்பார் என்று நினைக்கிறேன்.

இளவயதினரே கொஞ்சநேரம் இருக்கையில் தொடர்ந்து உட்கார்ந்திருந்தால் முதுகுவலியும் கழுத்துவலியும் வந்து வேதனைப்படுகையில், எண்பத்தொன்பது வயதிலும் தொடர்ந்து தமிழ்ச்சேவை ஆற்றுவது பாராட்டுக்குரியது. தமிழ், ஆங்கிலம், லத்தீன், பிரெஞ்சு, இந்தி ஆகிய மொழிகளைக் கற்றுத் தேர்ந்த அவர் தம் அனுபவங்களையும் ஆய்வுகளையும் மொழிபெயர்ப்புகளையும் பிற ஆக்கங்களையும் தானே தட்டச்சு செய்து தன் வலைப்பூவில் பகிர்ந்துவருகிறார்.

தன்னால் இயன்ற அளவுக்கு எழுதுவதிலும் வாசிப்பதிலும் பெரும்பாலான நேரத்தைச் செலவிடும் அவர், என்னுடைய இந்த நூலை பொறுமையாக வாசித்து கருத்துரைத்திருப்பதை அறிய மனம் உவகையில் நிறைகிறது. மூல ஆசிரியரைப் பாராட்டியிருப்பதோடு மொழிபெயர்ப்பையும் பாராட்டியிருப்பது பெருமகிழ்வைத் தருகிறது. வயதிலும் அறிவிலும் அனுபவத்திலும் மூத்தவரான அவர் என்னுடைய நூலுக்கு கருத்துரை வழங்கி சிறப்பித்திருப்பதை என் பெரும்பேறாகக் கருதி மனம் நிறைந்த நன்றியை நவில்கிறேன்.

நூல் குறித்த சொ.ஞானசம்பந்தன் ஐயா அவர்களின் கருத்துரையைக் காண இங்கு வருமாறு அன்புடன் அழைக்கிறேன். நன்றி.