மண்ணாசையோடீ...

நெஞ்சுக்குழிக்கும் தொண்டைக்குழிக்குமாய்

ஊசலாடும் அந்திம சுவாசத்தின் மர்மத்திறவுகோல் பற்றி

அங்கு எவருக்கும் தெரிந்திருக்கவில்லை.

குற்றவுணர்வில்லாமல் கொலை செய்வதெப்படியென

கற்றுத்தேர்ந்தவர்களையழைத்து கலந்தாலோசித்தார்கள்…

அறுபட விரும்பாது அலையும் அவ்வான்மாவின்

அறுதி இழையின் ரகசியப்பற்று குறித்து

ரகசியமாய்க் கூடி விவாதித்தார்கள்.

பதினேழு பெற்று பத்தைப் பறிகொடுத்து

மிச்சத்தின் மூலம் வம்சத்தின் எச்சம் வளர்த்தவளுக்கு

மற்றென்ன ஆசையிருக்கமுடியுமென்று

மாய்ந்து மாய்ந்தொரு முடிவுக்கு வந்தார்கள்.

பொன்னைக் கரைத்தூற்றியும் போகாத உயிரை வியந்து

மண்ணைக் கரைத்தூற்றி மரணம் தருவித்தார்கள்.

நா நுனியில் காத்திருந்த ஒப்பாரியோடு

நடுநிசியில் மாரடித்து அழுகிறார்கள்.

அடியம்மா… மண்ணுக்குப் போகும் வயதில்

மண்ணாசையோடீ உன்னைப் பிடித்து நிறுத்தியது என்று

மூக்கைச்சிந்தி முந்தானையில் துடைக்கிறார்கள்.

&&&&

(படம் : நன்றி இணையம்)