இல்லுறை தெய்வங்களின் வீதியுலா

பரண்மேலிருக்கும் பெட்டிகளை

பத்திரமாய் இறக்கித்தந்து 

இனிதே நிறைப்பர் ஆடவர் பாத்திரம்.

எதிர்பார்ப்பெல்லாம் இதற்கு மாத்திரம். 

கையிலெடுக்கும் ஒவ்வொரு பொம்மைக்கும்

பழங்கதையும் பாரம்பரியப் பெருமையும்

வருடந்தோறும் வாய் ஓயாது

பேசித்தீர்ப்பது பேரிளம்பெண்டிர் வழக்கம்,

செவிசாய்ப்பது சிற்றிளம்பெண்டிர்க்குப் பழக்கம்.

அழகுணர்வும் அடுக்கும் கலையுணர்வும்,

பொறுப்பும், புத்தியும், புதுப்புது நேர்த்தியும்

வரவேற்பும், உபசரிப்பும், வழிபாட்டு முறைகளும்,

வயதுக்கு வருமுன்னே மனதுக்குள் பதியனிடும்

உற்சவத்தின் உற்சாகத் துவக்கம்.

சிற்றில் விளையாடும் சின்ன மனுஷிக்கெல்லாம்

பட்டாடை அணிவித்து பலவாறாய் அலங்கரித்து

முகைநறுமலர் கூட்டி சிகைதனில் அழகுற சூட்டி

மயக்குறும் வண்ணம் மையால் விழியெழுத,

நங்கையெனத் தனைக்கண்டு

நாணமும் நளினமும் மிகக்கொண்டு

மின்னெழில் பிம்பம் நோக்கி மிரளும் மான்விழிகள்!

பொன்னகை பூட்டுமுன்னே

புன்னகை பூட்டிக்கொள்ளும் பூஞ்சிற்றிதழ்கள்.

தினமொரு அலங்காரமாய் தெருவெங்கும்

விளையாடும் தெய்வங்கள் அவதாரமாய். 

பாட்டுக்கே ஈயப்படும் புட்டும் சுண்டலுமென

பாட்டிமார் சொல்லக்கேட்டு

பாடிப்பெற்றப் பதார்த்தப் பரிசில்களை 

பாவாடையில் பொட்டலங்கட்டி

வெற்றிக்களிப்போடு வீடுதிரும்புகின்றன

வீதியுலா சென்ற இல்லுறைதெய்வங்கள் யாவும். 

 ************************************************************** 

படம் நன்றி: இணையம்